.gif)
निबन्धकार तथा नियात्राकार युवराज नयाँघरेसँग थाई नेपाली साहित्यप्रेमीहरूले बैंककमा साहित्यका विविध विधामाथि अन्तरसम्वाद गरेका छन् । ‘मदन पुरस्कार’ विजेता नयाँघरेको सम्मानमा आयोजित कार्यक्रममा प्रवासी नेपाली, थाई नेपाली र म्यान्माली नेपालीहरूले आ–आफ्ना रचना र विचार पनि प्रस्तुत गरेका हुन् ।
साहित्यकार नयाँघरेले स्थानीय अनुभूति र विषयलाई सम्मान गरी लेखिएको साहित्य लोकप्रिय र स्वीकार्य हुने बताए । ‘म्यान्माली नेपाली साहित्यकारले थाइल्यान्ड बसाइँको अनुभव कलात्मक ढंगले निरन्तर सिर्जना गरिरहनू, राम्रो गर्दै जानू, यहीँ छ मेरो शुभकामना छ ’उनले भने । साहित्यिक भेटघाट प्रेरणादायी, भावनात्मक र स्मरणीय वातावरणमा सम्पन्न भएको थाई नेपाली ‘आदर्श’ पुस्तकालयका अभियन्ता राज पौड्यालले बताए ।
‘हामीहरु अत्यन्तै खुशी छौँ । मदन पुरस्कार विजेता, वरिष्ठ साहित्यकार युवराज नयाँघरेज्यू हाम्रो कार्यक्रमको प्रमुख आकर्षण बन्नुभयो। उहाँको आत्मीयता, गहिरो चिन्तनशीलता र सरल व्यक्तित्वले उपस्थित सबैको मन जित्यो,’ उनले भने । कार्यक्रममा नयाँघरेको पछिल्लो कृति ‘तनक्खा’लाई केन्द्रमा राखेर चर्चा समेत गरिएको थियो ।
तनक्खा दक्षिणपूर्वी एसियाली मुलुक म्यान्माका विभिन्न गन्तव्यहरूमा आधारित एक उत्कृष्ट नियात्रा संग्रह हो । कृतिमा म्यान्माली नेपाली समाजको जीवन, सभ्यता,संस्कृति, धर्म, सार्वजनिक सरोकार र ऐतिहासिक पृष्ठभूमिको सूक्ष्म र गहिरो चित्रण गरिएको छ । म्यान्माका नेपालीभाषीहरूले ‘तनक्खा’सँग जोडिएका आफ्ना अनुभवहरू साक्षात लेखकसँग बाँड्ने मौका पाएकोमा खुशी व्यक्त गरिएको छ ।
म्यान्मालीहरूको भाषिक, सांस्कृतिक र सामाजिक अवस्थाबारे प्रस्तुत गरेका विवरणहरूले कार्यक्रममा थप गहिराइ र भावुकता थपेको थाइल्यान्डमा रहेका पत्रकार लोकेन्द्र ओलीले बताए ।
‘बैंककको साहित्यिक साँझले प्रवासमा रहेर पनि नेपाली साहित्यको चेतना, भावना र अभिव्यक्तिलाई जीवन्त राख्न सकिन्छ भन्ने आभाष गरायो,’ उनले भने । साहित्यिक समारोहमा अशोक घिमिरे, दीपा राना, रीत निरौला गुरागाईं, लोकेन्द्र ओली, कोमल भट्टराई, राज पौड्याल, गंगा बस्नेत, भारती अधिकारी, तिलक पोखरेल, विना ढकाल, करुणा भुजेललगायतको सहभागिता थियो ।
.jpeg)
.gif)
