.gif)
राष्ट्रिय प्रजातन्त्र पार्टी (राप्रपा) ले संसद बहिष्कारलाई आज मंगलबार पनि निरन्तरता दिने निर्णय गरेको छ । आन्तरिक छलफलपछि यस्तो निर्णय लिएको राप्रपाका प्रमुख सचेतक ज्ञानेन्द्र शाहीले जानकारी दिएका छन् । ‘विरोध नियमित राख्ने निर्णय भयो ।
सुरुमा कुरा राख्छौं र संसद्को काम कारबाही बहिष्कार गर्छौं’ शाहीले सुनाए । उनका अनुसार सरकारले गठन गरेको उच्चस्तरीय छानबिन समितिले भिजिट भिसा प्रकरणमा प्रभावकारी काम गर्न नसक्ने निष्कर्षमा राप्रपा छ । सोमबार साँझ बसेको मन्त्रिपरिषद्को बैठकले पूर्व मुख्यसचिव शंकरदास बैरागीको नेतृत्वमा छानबिन समिति बनाएको छ ।
उक्त समितिमा सम्बन्धित मन्त्रालयहरूका सहसचिवहरू रहने छन् । भिजिट भिसा प्रकरणलाई लिएर राप्रपाले संसद्को काम कारबाही बहिष्कार गर्दै आएको छ । अवरोधकैबीच सरकारले बजेटमाथिको छलफल अघि बढाउँदै आएको छ ।
आफूहरू उच्चस्तरीय न्यायीक आयोग गठन गर्नुपर्ने मागमा रहेको शाहीले बताए । भिजिट भिसा प्रकरणमा गृहमन्त्री रमेश लेखकको राजीनामा र उच्चस्तरीय छानविन आयोगको माग गर्दै लगातार संसद अवरोध गर्दै आएका रास्वपा पनि आजको संसद वैठकमा कसरी प्रस्तुत हुने भन्ने रणनीति बनाउन छलफलमा छ । अहिले रास्वपा संसदीय दलको वैठक बसिरहेको छ ।
.jpeg)
.gif)
