पाँच खेलको टी–ट्वान्टी महिला सिरिज नेपालले जितेको छ । आज भएको अन्तिम तथा निर्णायक खेलमा घरेलु टोली मलेसियालाई ३ विकेटले हराउँदै नेपालले सिरिज ३–२ ले हात पारेको हो । मलेसियाले दिएको १ सय १० रनको लक्ष्य पछ्याएको नेपालले १९ ओभर २ बलमा ७ विकेट गुमाएर लक्ष्य पूरा गर्‍यो । नेपालकी सीता रानामगरले सर्वाधिक ३४ रन बनाइन् । यस्तै, कप्तान रूबिना क्षेत्रीले २३, अप्सरी बेगमले १५ तथा ज्योती पाण्डेले ११ रन बनाइन् । मलेसियाकी हमिजा हसिमले २ विकेट लिइन् । त्यसअघि टस हारेर पहिले ब्याटिङ गरेको मलेसियाले निर्धारित २० ओभरमा ५ विकेटको क्षतिमा १ सय ९ रन बनाएको थियो । मलेसियाका वान जुलियानले ४७ रन बनाइन् । यसैगरी विनिफ्रेड दुराइ सिंघमले २, महिराह इज्जाती इस्माइलले २० रन जोडिन् । नेपालकी कविता जोशीले २ तथा ईश्वरी बिष्टले १ विकेट लिइन् । नेपालले सिरिजमा यसअघि दोस्रो र तेस्रो खेल जितेको थियो भने पहिलो र चौथो खेलमा पराजित भएको थियो ।