म्याग्दीको ग्रामिण क्षेत्रमा परम्परागत प्रविधिमा आधारित उखु पेल्ने कोल अझै लोकप्रिय छ । आधुनिक विद्युतीय मेशिन अर्थात मिलको प्रयोग बढ्दो समयमा यहाँका बासिन्दाले भने उखु पेल्न परम्परागत कोलको प्रयोगलाई निरन्तरता दिएका हुन् । कोलमा पेल्दा धेरै रस आउने, शुद्ध र राम्रो हुने कृषकहरुको भनाई छ । कोलमा पेलेको उखुको रस स्वस्थकर हुने उनिहरु बताउँछन् ।

कोलमा पेलेर निकालिएको उखुको रस पकाएर खुदो बनाउने गरिन्छ । चिनिको उपलब्धता नहुँदा गाउँघरमा गुलियोगका लागि खुदो प्रयोग हुन्थ्यो । खुदोलाई पुजाआजामा पनि प्रयोग गरिन्छ । मंगला गाउँपालिका–२ सिमका खगेन्द्र केसीको घरमा पचास वर्षदेखि एउटै कोल प्रयोग भइरहेको छ । सो कोलमा उखु पेल्न बाबियाचौर, कुहुँ, अर्मन, बरंजाका साथै बेनी नगरपालिका र मालिका गाउँपालिकाबाट कृषकहरु आउने गरेका छन् । कोलमा उखु पेले वापत १५ लिटर बराबर ८० रुपियाँ शुल्क तोकिएको छ ।

मानिस वा गोरुले तेर्सो पारिएको काठलाई घुमाउएर मुडा र फलामबाट बनाइएको कोल चलाउने गरिन्छ । गोरु नभएको अवस्थामा मानिसले काठ घुमाउने गर्दछन् । फलामको कोलको बिचमा उसु राखेर काठ घुमाएपछि रस झर्ने गर्छ । कोल चलाउन दुई देखि तीन जना जनशक्ति आवश्यक पर्छ ।