इन्जिनियरिङ अध्ययन संस्थान (आईओई)अन्तर्गत बीईका १२ कार्यक्रमका निम्ति १० हजार विद्यार्थीले प्रवेश परीक्षा दिँदै छन् । यही कात्तिक १४ गतेदेखि सुरु परीक्षा आईओई पुल्चोक र पश्चिमाञ्चल क्याम्पस पोखरामा भइरहेको छ ।

विद्यार्थीको चापलाई मध्यनजर गर्दै चार सिफ्टमा परीक्षा भइरहेको आईओईका सहायक डिन सुशील बज्राचार्यले जानकारी दिए । त्रिविअन्तर्गतका १५ इन्जिनियरिङ क्याम्पसमा चार हजार ४४ विद्यार्थी पढ्न पाउनेछन् । त्रिविको तालिकाअनुसार भदौमा हुनुपर्ने प्रवेश परीक्षा आईओईले सिभिल र आर्किटेक्चर इन्जिनियरिङको अध्ययन शुल्क वृद्धि गरेको विरोधमा दुई महिना पछि धकेलिएको थियो । यही शैक्षिकसत्रदेखि चारवर्षे बीई र बी आर्क अध्ययनको पूर्ण शुल्क सात लाख ७७ हजार ४२० रुपैयाँ पुर्‍याउने आईओईको निर्णय थियो ।

 शुल्क यसअघि तीन लाख १८ हजार रुपैयाँ थियो । विद्यार्थी संगठनको लामो आन्दोलनपछि आईओईले यी दुई विषयमा चारवर्षे स्नातकको पूर्ण शुल्क चार लाख ९० हजार रुपैयाँ तोकेको छ । यो शुल्कमा सरोकारवाला सबैको सहमति भएपछि प्रवेश परीक्षा लिइएको हो । परीक्षा कात्तिक २० गतेसम्म चल्नेछ ।