जनमत पार्टीका अध्यक्ष चन्द्रकान्त राउत (सीके राउत) ले संसदमा सांसदलाई बोल्ने समयमा एकरुपता कायम गर्न माग गरेका छन् । आज (मंगलबार) संसद बैठकमा बोल्दै पार्टीका अध्यक्ष राउतले ठूला दललाई बढि समय र साना दलका सांसदलाई थोरै समय दिएको भन्दै सभामुखको ध्यानाकर्षण गराए । ‘संसदमा ९० सिट भएको दललाई ९० मिनेट र एक सिट मात्र भएको दल वा स्वतन्त्र सांसदलाई एक मिनेट समय दिइयो भने यो कति वैज्ञानिक छ ?,’ उनले भने, ‘यदि यसैलाई आधार मान्ने हो भने ९० सिट भएको पार्टीको सभासदलाई चिया खान पनि ९० मिनेट दिनुपर्‍यो । १ सिट मात्रै भएको सभासदलाई चियाखान वा वाथरुम जान एक मिनेट दिने देखियो ।’ सांसदहरुलाई छुट्याएको समय व्यवहारिक नभएको भन्दै उनले आक्रोश व्यक्त गरेका छन् । उनले भने, ‘यो समय वैज्ञानिक र व्यवहारिक हो कि होइन यसबारेमा सोच्नुपर्ने बेला आएको छ ।’ नेता राउतले संसदीय अभ्यासलाई समयअनुकूल बनाउन जरुरी रहेको बताए । यस्तै नेता रावतले संसद सञ्चालन नियमावलीमा व्यवस्था भएअनुरुप ठूला दलका सांसदको बैठकमा उपस्थित नदेखिएको भन्दै आपत्ति जनाएका छन् । उनले नियमावली साना दललाई मात्रै हो कि भन्दै प्रश्न गरेका छन् । उनले भने, ‘संसद सञ्चालन नियमावलीमा जसरी सबैको उपस्थित हुनुपर्छ । तर त्यसो देखिएन । त्यो नियमावली सानासाना दलका सांसदलाई मात्र हो कि ठूला दललाई पनि हो । यसमा पुनर्विचार गरियोस् ।’ हेर्नुहोस् यो भिडियो पनि: https://youtu.be/115EIUgAnxA