बैतडीका गाउँगाउँमा भाइरल ज्वरोको प्रकोप बढेको छ । जिल्लाका सबै जसो स्थानमा भाइरल ज्वरोका बिरामी बढेका स्वास्थ्यकर्मीहरूले बताएका छन् । मौसममा आएको परिवर्तनसँगै भाइरल ज्वरोका बिरामी बढेका जिल्ला अस्पताल बैतडीमा कार्यरत डाक्टर धिरज जैसवालले बताए । जिल्ला अस्पतालमा उपचारका लागि आउने बिरामी मध्ये सबैभन्दा बढी भाइरल ज्वरोका बिरामी रहेका उनले बताए ।

मौसममा आएको परिवर्तनसँगै गाउँगाउँमा भाइरल ज्वरोको प्रकोप फैलिएको सुर्नया गाउँपालिका ७ स्थित शिखरपुर सामुदायिक स्वास्थ्य इकाइमा कार्यरत अहेब हिक्मतबहादुर कुँवरले बताए । स्वास्थ्य इकाइमा हिजोआज दैनिक ३० जना भन्दा बढी भाइरल ज्वरोका बिरामी आउने गरेका उनले बताए । मौसम परिवर्तनका साथसाथै अस्वस्थकर खानपिनले पनि भाइरल ज्वरोको संक्रमण बढेको डा। जैसवालको भनाइ छ । ज्वरोका बिरामीहरूले नजिकै स्वास्थ्य संस्थामा चेकजाँच गर्नुपर्नेमा उनले जोड दिए । ज्वरोका बिरामीहरूमा अन्य संक्रमण पनि हुन सक्ने भएकाले स्वास्थ्य संस्थामा जाँच गराउनुपर्ने उनले बताए ।

पछिल्लो समयमा जिल्लामा भाइरल ज्वरो मात्रै नभएर टाइफाइड, स्क्रब टाइफस, डेंगु लगायतका बिरामीहरू पनि फेला परीरहेका डा। जैसवालले बताए । ज्वरोका बिरामीहरूले स्वास्थ्य संस्थामा चेकजाँच गराएर मात्रै औषधि सेवन गर्नुपर्ने डा। जैसवालले बताए । ज्वरोका बिरामीहरूले मेडिकलहरुबाट आफूखुसी औषधि किनेर प्रयोग गर्ने भएकाले यसले समस्या बल्झिन सक्ने उनले बताए । जथाभावी औषधिको प्रयोगले मानवको स्वास्थ्यमा गम्भीर समस्या निम्त्याउने भएकाले स्वास्थ्य संस्थामा चेकजाँच गराउनुपर्ने उनले जोड दिए ।