श्रीमान्–श्रीमतीबीच झगडालाई परालको आगो भनिन्छ अर्थात् छोटो समयको मात्र । तर भारतको उत्तर प्रदेशमा पर्ने आगरामा श्रीमान्–श्रीमतीबीच झगडाको एक अनौठो घटना बाहिर आएको छ । पारिवारिक परामर्श केन्द्रमा काउन्सिलिङका लागि पुगेका श्रीमान् श्रीमतीले एकअर्कालाई मदिरा सेवन गरेको आरोप लगाएका छन् ।

श्रीमतीले मदिरा सेवन गरेको आरोप लगाउँदै श्रीमान भन्छन ‘रक्सी पिएर मेरो इज्जतको धज्जी उडाउँछिन् र चोक चौराहामा कोलाहल मच्चाउँछिन्।’ प्रमाणको रूपमा, श्रीमानले सल्लाहकारलाई भिडियो पनि देखाए। भिडियोमा श्रीमान डराएर भागिरहेको छन् भने श्रीमतीले गाली गरिरहेकी छिन् । श्रीमानको कुरा सकिएपछि श्रीमतीले आफ्नो कथा सुनाउँदै भनिन् – ‘पहिले दिनहुँ श्रीमान रक्सी पिएर आउने गर्थे, घर आएपछि नयाँ–नयाँ बहाना खोजेर झगडा गर्थे । उनीसँग दिनहुँ झगडा हुन्थ्यो । दिनहुँको कुटपिटबाट दिक्क भएर मदिरा सेवन गर्ने व्यक्तिको जस्तै मैले व्यवहार गर्न थाले ।’

उनले श्रीमानलाई आफ्नै भाषामा पाठ सिकाउन थालिन् । श्रीमतीका अनुसार उनी आफू मदिरा पिउँदिनन्, तर श्रीमानको नशाबाट छुटकारा पाउन लागुऔषध दुव्र्यसनीजस्तो अभिनय मात्रै गर्छिन् । दुवै पक्षको कुरा सुनेपछि काउन्सिलरले उनीहरुबीच लिखित सहमति गरेका हुन् ।

सहमतिपछि श्रीमानलाई रक्सी नपिउन निर्देशन दिइएको छ । श्रीमानले अब हप्तामा एक पटक मात्रै रक्सी पिउने सल्लाहकारको उपस्थितिमा लिखित प्रतिवद्धता दिएका छन् । उनले श्रीमतीसँग कहिल्यै झगडा नगर्ने लिखित सहमतिपछि श्रीमान्–श्रीमतीसँगै घर फर्किएका छन् । श्रीमान्–श्रीमतीबीचको झगडाको यो विषय चर्चाको विषय बनेको छ ।