विवाह समारोहमा एक बालकले बेहुलाका बुवाको लुगामा दही पोखिदिएर पैसाको झोला लिएर फरार भएका छन्। घटना भारतको पञ्जाव प्रान्तको लुदियानाको हो। दही पोखिएपछि ती व्यक्तिले लुगा सफा गर्न थालेपछि बालकले नजिकै रहेको पैसाको झोला लिएर भागेका थिए।

बच्चाले यस्तो चलाख ढंगले अपराध गर्दा बेहुलाका बुवाले भने थाहा नै पाएनन्। घटनापछि उक्त समारोहमा भएको सीसीटीभी फुटेज जाँच गरी प्रहरीले ती अपरिचित बालकविरुद्ध मुद्दा दर्ता गरेको छ।

बेहुलाका बुवाले भनेका छन्, ‘छोराको बिहे हुँदै थियो । जुलुस गाउँबाट देहलोनको मिलन दरबारसम्म आएको थियो । विवाह समारोहमा एक बच्चा वरिपरि घुमिरहेको थियो।विवाहमा आएका परिवारको बच्चा होला भन्ने लाग्यो । केही समयपछि मेरो पाइन्टमा दही पोखिदियो।’

उनले थपे, ‘झोला कुर्सीमा राखेर प्यान्ट सफा गर्न थालेपछि पछाडिबाट झोला उठाएर बालक भाग्यो ।’ उनले उक्त बालकको बारेमा सोधेका तर कसैले पनि नचिनेको बताएका छन्। झोलामा करिब ८५ हजार भारु र सुनको औंठी रहेको बेहुलाका बुवाले प्रहरीसमक्ष जानकारी दिएका छन्।